احبك

بسم الله الرحمن الرحيم 

- ليه كلمت طارق على الطلعة ؟؟

- مو انا كلمته.

- يخي قولي طيب انه جاي ، تعرفني مااطيقه.

- مدري عنك والله.

في محادثة ثانية: 

- يخي بدري تبدؤوا الشوي من دحين والاكل ناقص.

- كلنا جيعانين و نبغا ناكل ، والاكل كفى و زاد شوي كمان !

- مدري و حسيت الخلطة لك عليها.

- ممممم انا اشوفها طيبة 

وكثييير من المحادثات علي كان دائما يتعنت من صديقه رائد. في كل طلعة يخترع مشاكل. 

للاسف علي نادرا ما جرب هو ينسق الطلعات ودائما يكون هو المعزوم ، ماكان يعرف انه تنسيق الطلعة لحاله كفيل بانه يصدع راسك فما بالك بشخص بعد التنسيق والتعب يتعنت منك ؟! 

 رائد في مرة من المحادثات طفح به الكيل ، و قال ل علي "انا اسف اني كلمتك اصلا " ، بعدها علي احس بتانيب الضمير و احس انه ماكان ماخذ الموضوع من منظور كامل ، ما كان ماخد الموضوع من منظور علي و خالد و ماجد و من جميع الاطراف. 

  العقل الافكار اللي تدخلها فيه راح يستخرج لك طرق لتطبيقها لها ، اذا انت بتدخل افكار انه الطلعة ما عجبتك ح يخرج لك انه الاكل ناقص ، انه في انسان ما تحبه معاكم ، اي سبب سواء لك او عليك عقلك حيعطيك هو ، اذا دخلت في عقلك ايجابيات راح يخرج لك ايجابيات وتكون ايجابي ، عقلك مثل الحديقة ، راح تنمي لك اي شي تزرعه فيها ، اذا حطيت بذور نظيفة (افكار) راح تطلع لك (طرق واسباب وحلول) نباتات نظيفة ، واذا حطيت بذور فاسدة راح تطلع لك نباتات فاسدة ، ف احذر ما تزرع في مخك ! 

واحدة من مشاكل علي انه تفكيره سلبي دائما ومحدود ، يحسب انه العالم حاقد عليه او كارهه او انه منعزل عن من حوله ، يحسب انه مافي احد يحبه او مستعد يساعده ، 

علي : -احبك

-اش اسويلك طيب؟

- يخي مدري اي شي مااتوقعه .

- زي؟

- ممممم مثلا تسالني عن اهلي. تقولي موضوع مااعرفه او حاجة مااعرفها عنك . اي شي.

-كلها مالك صلاح او مالي صلاح فيها. 

-يخي طيب كيف أعرف انك تحبني؟

- مو لازم تعرف

- ااااه والله جد يخي كيف اعرف؟

- انا اقولك . ادا احتجنا شي من بعض ح نطلبه من غير تفكير . قلوبنا على بعض . و كل واحد يبغا الثاني يكون مبسوط.

- اهاااا. بس كل دا ما يعطيك دليل حقيقي. 

- اعطيني مثال على  دليل حقيقي

- نخرج اكثر مع بعض أو نتكلم اكثر .

- انت مو خويتي عشان اكلمك كل شوية وخرجاتنا اشوفها طيبة . 

- اوكي انا عارف بس ترا هيا الأشياء البسيطة دي اللي تفرق مع الواحد . 

- شوف يا علي . حط في بالك حاجة مهمممممة مرة. طريقة الحب تختلف من شخص لشخص . ممكن واحد ما يكلمك غير في السنة مرة. بس تفكيره كله فيك . ممكن واحد يقولك مااطيقك في وجهك بس بينه وبين نفسه يبغاك تتعلم وتبطل شك و وسوسة.  

- ممممممم طيب المهم والله احبك يخي وانت تصرفاتك تقهر .

 - انت مو تحبني ؟

 - اكيد

- خلاص طيب لا تنتظر شي مني. انت سوي الأشياء اللي تبين انك تحبني وخلاص

- طيب المشكلة اني اسويها وماا اشوف فرق في التعامل معاك .  

 - طيب انا اقولك حاجة ثانية. انت مالك صلاح بالشي اللي انا اسويه ابدا . تعرف ليه ؟. لانه مافي احد حيمشي على هواك . ماااافي . مافي احد يعرف اش فيه ف عقلك و اش تتمنى في حياتك غير ربنا. ف انت ادعي ربنا ب اللي تبغاه واتوقع منه كل شي. بس لا تتوقع اي شي من اي كائن بشري. انت اطلبهم .اذا  سووا الشغلة سووها ما سووها خليك طبيعي جدا. 

- اهاااا. يخي طيب كدة محا اتطمن 

- شوف لو تبغا تتطمن حتموت وتتجنن . مخك حيفصل و حتنتحر في النهاية. انت اللي ح تحبه ح تحبه مهما سوا فيك ومهما تركك ومهما كانت ردة فعله .... انت لسه ح تحبه ، حتى لو قلت ابغا اكرهه وماعاد افكر فيه ، انت بتضحك على نفسك وحترجع بعد فترة تتقرب ممن تحب.  واهم حاجة للسعادة والراحة ف العلاقات انه لا تتوقع اي شي من اللي امامك وخصوصا ممن تحب، انت سوي اللي تشوفه صح واللي تشوفه يبسطك ، ممكن لو ابتسم من تحب تنبسط ، ف ابحث عن اشياء تسعد من تحب وهكذا ، اهم شي ف النهاية انك ماتندم و تفكر وتقول لو سويت كدة ممكن يكون احسن، افعل كل شي ممكن وكل شي تشوفه يصب في مصلحتك ولا تنتظر مردود، اذا اللي تحبه رد لك بفعل كنت متوقعه فهذا شي طيب واذا كان رده اقل من المتوقع ف لا تزعل لانك انت سويت اللي عليك.   لا تتوقع اي شي من احد . انت سوي اللي عليك معاهم و اعطيهم ما عندك ، عشان لما تفكر ما تندم وتكون مرتاح انك سويت اللي عليك والغلط مو منك. 

- يخي طيب ليه تسوي أشياء واكون اخر واحد يعرف عنها بالرغم من انك تقولها لغيري من دون ما يسالك حتى ؟

- أولا انا حر. وثانيا ترا والله حتى لو قلتلك كل شي مو معناه اني احبك أكثر واحد. 

- ممممممم. طيب يعمي المهم ادا تبغا نتقابل كلمني

 - ان شاء الله

 علي ما اقتنع كثير بالمحادثة. و مقتنع انه الشخص اللي يحبه راح يخترع وقت عشانه و راح يسوي له اي شي يبسطه. حاول يطبق كلام صديقه بانه يهتم بفعله بس بغض النظر عن الطرف الاخر. لكن هو كان عنده نقص اهتمام من الاخرين. يتمنى لو في شخص واحد فقط يهتم فيه او يعطيه من وقته او يسأل عنه. هذه كانت مشكلة علي. بعد بحث طويل ع الانترنت  لاحظ أنه في ناس كثير عندهم هذه المشكلة. و افضل حل هو انك تهتم لنفسك بنفسك وتسال عن حالك بنفسك. علي قال في نفسه اش الجنان دا .كيف أسأل عن نفسي بنفسي؟ و بعد مااتعمق فهم انه يسال عن نفسه ب انه يهتم في نفسه. ينظر الى الأشياء اللي تسعده وينفذها. يهتم بجسمه. يهتم باهله. بمن يحب. ب علاقته مع ربه. بدراسته. بوظيفته. باي شي له علاقة بنفسه. يعني عوضا عن الانتظار من الاخرين للسؤال عنك. انت اسال نفسك وابدا اهتم فيها وطورها. علي قال في نفسه اش ح استفيد طيب؟ محد ح يهتم انا اش سويت أو اش انجزت. لكن هدا هو المغزى ، انك انت تهتم بنفسك فقط و تهتم ب ايش انجزت و ايش حققت في حياتك. لانها في النهاية هيا حياتك اللي انت تبغا تعيشها. ليست حياة شخص آخر. انت افعل الأشياء اللتي تريد ان تفعلها في حياتك وتتمنى انك تجربها قبل لا تموت. استغل كل ثانية في حياتك ولا تفكر بالمستقبل او الماضي. عيش اللحظة الحالية فقط. وقت الدراسة لا تفكر ماذا سوف اتغدى او متى راح ارجع المنزل. عيش المحاضرة و اتفاعل معاها. عند قيادة السيارة اتفاعل مع القيادة اجعل كل تركيزك على اللحظة الحالية فقط ، اي المسارات اسرع ، اي الطرق اامن و هكذا . لانه ببساطة هدية هذه الحياة هي الحاضر. على بدا يفكر بهذا الاسلوب ، بدا يهتم لنفسه ولا ينتظر الاهتمام من الاخرين ، بدا يركز على اللحظة الحالية ولاحظ انه بينجز اعمال اكثر و بدقة وجودة اعلى في زمن قياسي عند التركيز على الحاضر ، ولاحظ ايضا انه الافكار السلبية تبتعد عنه عند التركيز على الحاضر. طبعا هنالك ايام تاخذه هذه الافكار بعيدا عن الحاضر وعن نفسه لكنه يحاول كتمان ما يحدث داخله و يتذكر بان يهتم بنفسه فقط. 

اعتراف: الكلام المكتوب في كل قصصي مو شرط يكون هو مبادئي او وجهة نظري ، هو مجرد كلام عجبني و حبيت اشاركه معاكم ، كلام اتعلمته من تجارب واشخاص و كتب و اشياء كثير ، بعضه نسخته او اخذت نفس فكرته بس غيرت المحتوى. 

شكرا :)