صالح وصديقته

صالح يعتقد انه يقدر ان ينجح في الأشياء الغير متعلقة او مرتبطة بأحد الا به، لذلك هو لا يهتم بهذه الأشياء كثيرا، يهتم و يعتني بعلاقاته مع اصدقائه لانه يعتبرهم اخوانه و هم من سيساعدوه خلال ازماته لان اسلوب حياتهم مثله و مقدرين مشاكله و ازماته بشكل كبير، صحيح ان اهل صالح مهتمين بصالح لكن تظل هنالك مشاكل لا يستطيع حلها الا اصدقائه، وهو شاكر ربه وممتن له للابد لرزقه بأصدقاء مميزين و رائعين مثل اصدقائه. 

صالح عنده مبدأ وهو هو عدم تكوين علاقات مع الفتيات، صالح لديه عدة اسباب لهذا الشي وهي:

1- حرام

2- يفتح لنفسه باب لاوجاع الرأس و الهموم اللتي هو في غنى عنها. 

3- احتمالية كبيرة لتضييع فلوسه على فتاة  بالشحن لها او الخروج معها وممكن في الاخير ان فتاة تتركه و تستغله.  

4- مره ثانيه ان هذا العمل حرام.

وفي يوم من ايامه العاديه، قرر صالح ان ينشئ موقع تواصل عربي يتناسب مع ديننا و عاداتنا، لكن قبل ان ينشئه كان يحتاج معلومات من الناس لكي تساعده في معرفه احتياجات ورغبات الناس

في مواقع التواصل الاجتماعية، كان يحتاج ان يعرف أكثر عن احتياجات الفتيات في المواقع، لهذا السبب كلم صالح اخته و بدأ يطلب منها ان تبحث من صديقاتها عن اي احد مستعد لمساعدته، اخته وجدت صديقه من صديقاتها مستعده، اتواصل معاها صالح وبدأ ياخذ منها معلومات عن احتياجاتها و مشاكلها و اقتراحاتها لمواقع التواصل الاجتماعي، مبدئيا صالح يحتاج احد يساعده لموقعه، ولمياء (صديقة اخته) كانت تبحث عن احد يساعدها في حياتها الخاصة ويعطيها ثقة اكبر في حياتها. 

بدأوا يتواصلوا أكثر مع بعض، وبدات علاقتهم، تتحول من علاقة عمل الى اصدقاء، لكن صالح لم يستوعب هذا التحول، ولاحظ ان لمياء تشغل وقت كبير من يومه والمشكلة الاكبر انها تشغل جزء كبير من تفكيره، حاول ان يتوقف عن التواصل معها لكن عقله اللاواعي من الناحية الفلسفية يفكر لا اراديا بها و يخترع مواضيع وأفكار بشكل مستمر للتواصل معها، صالح لايعرف سبب هذا الشيء لكنه يعتقد ان السبب هو وقت فراغه الكبير و حاجته لوجود شخص يتواصل معاه ويشاركه حياته اليومية، من الناحية الثانية لمياء وقت فراغها كبير ومثل صالح عقلها يفكر في صالح بشكل كبير.

الفرق بين الرجل والمرأة هو الفرق بين لمياء وصالح، الرجل غالبا لا يستطيع كبت مشاعره وعجول في حياته وعلاقاته، المرأة لديها مقدرة خارقة -ماشاء الله-، تستطيع كبت مشاعرها حتى لو كانت بحاجة شديدة للتواصل مع شخص اخر، تحاول دائما ان توفر مشاعرها وهمومها واحساسها لشريك عمرها بالرغم من انه من الممكن ان يكون شريك عمرها لا يهتم بمشاكلها كثيرا، وهذا الشي طبيعي لان البشر ببساطة مختلفين، المرأة الذكية غالبا تحاول ان تكون مستقلة بذاتها و تكون معتمدة على نفسها ولا تحتاج لأحد، وبعض البشر لايحب ان يشارك مشاكله وهمومه مع احد حتى لو كان شريك حياته. 

صالح لديه مبدأ مختلف قليلا عن مبدأ توفير المشاعر، صالح يعتقد ان السعادة تكمن في استغلال اللحظات الحالية وعدم الانتظار والتاخير، لان الحياة غير مضمونة وممكن في اي لحظة ربنا ياخذ روح الانسان، لذلك احيانا يستعجل صالح في بعض امور حياته المتعلقة مباشرة بسعادته. 

مبدأين مختلفين ولكل منهما أدلة بأنه هو المبدأ الصحيح، ولكن هذا هو المميز في البشر، الاختلاف لا يكون مضاد ولا عكس التيار ولكن يكمل بعضه ويعطي كل شخص رونقه واسلوبه الخاص فيه.

بعد فترة من التواصل، صالح انتهى من مشروعه و كان يتمنى ان لا ينتهي لانه يعرف ان نهاية مشروعه تعني نهاية علاقته بلمياء. 

- شكرا على وقتك ومع السلامة.  

ارسل لها صالح هذه الرسالة و بعدها حذف اسمها من المحادثات لينساها، و بعد ساعة تقريبا ردت عليه "عفوا وبالتوفيق للجميع". حذف المحادثة مرة اخرى بعد رسالتها. مرت الايام وصالح لازال يفكر فيها. يحاول ان يرسل لها لكن عقله يمنعه. يقول في نفسه "لو أرسلت لها يعني  اني احتاجها وانها هي المسيطرة" و من الناحية الثانيه يقول "ممكن هي تفكر نفس تفكيري و تنتطر رسالة مني"

صالح يريد علاقة شبه خيالية، يريد ان تكون علاقة حبه متبادلة ويريدها بأسرع وقت، بعد ماكان يكره تكوين علاقات، الان جربها بنفسه ولاحظ انها تعطيه شي من الأمان والطمأنينة والثقة بالنفس، احساس جميل عندما تشعر ان شخص في هذا الكون مهتم بك، و يريد ان تعطيه من وقتك و يتمنى ان يتواصل معك اكثر. 

أصبح صالح تائه ولا يعلم اذا كان من الأفضل ان يتواصل مع لمياء او تركها و البحث عن غيرها، يبحث عن فتاة جديدة وتكون علاقتهم من البداية مبنية على الصداقة وليس العمل، بدأ يفكر عن طرق للتواصل مع اي فتاة لكن هتذكر ان هذا الشيئ يتطلب وقت كبير وغير مضمون ابدا، بالإضافة انه من الممكن ان يتعرف على فتاة لا تناسب طموحه. اخيرا، صالح قرر بأنه اما ان يكمل مع لمياء او ان يقفل هذا الباب و يعود لروتينه القديم.

صالح اكمل أيامه ينتظر رسالة او اي شيئ من لمياء، كل مرة يهتز او يرن جواله يقفز و يعتقد بأن الاتصال منها لكن يكتشف ان الاتصال من اهله او اصدقائه وتموت الفرحة الوهمية، وبعد اسبوعين من اخر تواصل بينهم اهتز جوال صالح و اخذه بدون مبالاة ليرى اسم المرسل، الا انه اكتشف ان الرسالة من لمياء!

- سلام عليكم كيف حالك صالح؟ اردت فقط ان اتطمن عليك واتاكد ان المشروع بخير. 

تفاجأ صالح من الرسالة و اصبح مباشرة سعيد جدا ثم ارتبك قليلا ليفكر في رد مناسب لها، في داخله يقول "انا مشتاق لكي واحتاجك اكثر في حياتي" ولكن من الخارج سيقول "الحمدلله بخير و كل الامور على مايرام".

بدأ يخاف من المستقبل،  لانه يخاف من فقدان شخص مقرب جدا و لايحتمل فقدانه، لكن صالح كان في الماضي يخاف من هذا الشيئ مع اصدقائه المقربين ثم بعد فترة اصبح لديه خبرة كافية في الخوف من المستقبل، تعلَم ان لكل شخص يتعرف عليه وقت و زمان خاص فيه، و تعلًم ان العجلة في العلاقات غالبا لا تثمر بفائدة كبيرة على الطرفين. و أخيرا تعلم ان ربنا مهيأ لنا كل شيئ و ان الاصدقاء و البشر مهيئين من ربنا و بعضهم نعمة علينا من ربنا واجب ان نشكر ربنا عليهم وعلى تعرفنا بهم، "الحمدلله، يجب ان اترك الامور لربي لانه يعلم بحالي و بالتأكيد كاتب لي افضل اشخاص باذن الله".

 رد عليها اخيرا ب:" مرحبا، انا الحمدلله بخير وكل اموري على مايرام، انتِ كيف حالك ؟"

مباشرة ردت عليه:" الحمدلله انا بخير وسلامة"

"لا أحتاج الى تصنيف علاقتنا، اذا حاولت ان اسعدها سأكون انا سعيد ايضا، لذلك اريد ان استغل فترتي معاها واكون سعيد من خلال ادخال السعادة عليها، لكن في نفس الوقت يجب ان لا اظهر لها اي مشاعر خاصة، اذا اظهرت هذه المشاعر فهناك مخاطرة كبيرة بأن تتركني او ان تستغلني في اسوأ الاحوال"

لمياء: " ممكن اتعرف اكثر عليك؟"

-         بالتأكيد

-         شكرا، اول سؤال لماذا تخصصت في هذا المجال؟

هذا السؤال اصبح عادة في المحادثات، سؤال لايوجد هدف منه سوا ان يكون هنالك موضوع لكي يتحدث فيه الطرفين، رد عليها صالح بالرد المعروف في العالم بأكمله:

-         انا أحب هذا المجال وأرى نفسي مبدع فيه

دون القول ان هناك اسباب كثير جدا تجعله يدخل هذا التخصص، منها اسباب اضطرارية مثل تلبية رغبات الوالدين، او ان المعدل لم يسمح الا بالدخول لهذا التخصص، او ان الجامعة لايوجد بها جميع التخصصات، او او او...، في النهاية صالح مثل باقي البشر، متخصص ولا يعلم اذا كان هذا التخصص مناسب له فعلا او لا.

لمياء اصبحت جزء من حياة صالح والعكس، يوميا يتواصلوا مع بعض و يتشاركوا احداث حياتهم، مشاكلهم، اغانيهم المفضلة، واشياء كثيرة اخرى ،بعضها غير مهمة ابدا لكنها تصبح مهمة عندما يكون الشخص نفسه مهم في حياة الطرف الثاني. صالح في هذه الفترة كان سعيد سعادة لاتوصف، لكنه يعلم في داخله ان هذه السعادة مؤقتة وممكن ان تنتهي في اي لحظة ويعود لروتينه القديم الممل.

خلال علاقتهم ببعض، احيانا لايرسل احدهما للاخر لرؤية من يتنازل عن هذا التغلي الوهمي و يبدأ بالارسال، وحتى عند التواصل احيانا احد الطرفين يترفع عن الرد لاختبار هل الطرف الثاني يرسل رسالة اخرى او لا، و اشياء اخرى غيرها لاتسمن و لاتغني من جوع يفعلوها فقط لكي ينام قلبهم براحة وطمأنينة بأن احد البشر يهتم لأمرهم، لكن في النهاية الاثنين لديهم معزة لبعض و اذا احتاجوا لشيء فعلا.. الطرف الاخر سيقدم كل مالديه للمساعدة.

بدأ صالح يفكر اذا بينه وبين لمياء حب ام مجرد علاقة عابرة، هل سيستمر في التواصل معها للابد ام سيتركها اذا تزوج، ام هل سيتزوجها!، افكار كثيرة تدور في خاطره، بدأ يبحث في الانترنت عن الحب، عن معانيه واساليبه، وجد تعاريف متناقضة، ونصائح متناقضة، وجد بعض من المقالات لاشخاص يؤمنوا بالحب، يؤمنوا بأنه اقوى من اي شيئ في العالم و انه سيحل جميع مشاكل حياتنا، و في نفس الوقت وجد مقالات اخرى لاتؤمن به ابدا، وتقول ان الحب لله فقط، وان البشر لايستحقوا هذه القوة المفرطة، و اخيرا وجد مقالات لاتؤمن به من الاساس وتقول انه مجرد خرافة مثل الاشياء الخارقة اللتي نراها بالافلام ومستحيل ان تحدث في حياتنا الحقيقية. ولكن ماذا عن الشعراء اللذين كتبوا في الحب؟ هل هو حقيقة ام مجرد خيال؟ وجد ايضا من يقول انها اوهام كتبها الشعراء و وجدوا اقبال من الناس فاستمروا في الكتابة عن الحب. لكن صالح لديه وجهة نظره الخاصة و هي انه يؤمن بهذا الحب، يؤمن بوجوده، يؤمن بانه قوة قوية جدا صعب على نيوتن ان يحسبها. الحب خالد، مستحيل ان يتم نسيان حب شخص معين، و يبقى الحب في القلب للابد مهما صار ومهما حدث لهذا القلب فهو لن ينسى حبه لشخص معين. صالح يحب لمياء و لا يكترث ان كانت تحبه او لا، لأن الحب يموت عندما يتحكم شخص بالاخر، ولن يخبرها عن حبه الى ان يجد لحظة مناسبة يستطيع فيها ان يعبر عن مشاعره بكل ثقة لانه يعلم في تلك اللحظة انها ستتفهم مشاعره وتقدرها.

صالح اتخذ قرار بأن يستمر مع لمياء، يعيش اللحظة ويترك المستقبل لوقته، يسعدها و يساعدها وتساعده، يتعلم كل منهما من الاخر. ادرك صالح ان الحب لايتوقف على شخص معين، بل هو طاقة خارقة تستطيع بها حب العالم كله بنفس القوة والمقدار ولكن باساليب مختلفة. ومن الطبيعي ان يحب الشخص انسان لمجرد انه انسان، دون ان يقدم له هذا الانسان اي مساعدات او اتصالات او اي شيء، ان يحبه لمجرد انه يحبه فقط. الحب لا يحتاج الى اسباب ومبررات، هو من يأتي من القلب وسببه القلب.

وفي احد محادثات صالح مع لمياء تحدثوا عن الحب وقالوا:

-         حكيني عن الحب...

-         عن اي حب؟

-         حكيني عن الحب نفسه.

-     الحب هو التضحية و الثقة العمياء و الغيرة المفرطة و التناقض و الجنون وغيره من اشياء كثيرة كلها مجموعة في كلمة واحدة...الحب.

-         اكملي.

-         الحب يعني ان تزعج وتضايق المحبوب وايضا ان تترك المحبوب على هواه. يعني الحقد المبطن بحب يتمنى كل الخير. يعني اللامبالاة و المراقبة في نفس الوقت.

-        يعني ببساطة الحب هو التناقض!

-         الحب ان تتعصب لشخص ولآرائه وتدافع عنه حتى وان كان على خطأ، من دون ان تعلم انك متعصب ومنحاز له.

-         صدقتي هنالك اشخاص اتعصب لهم لا اراديا ثم ادرك اني كنت متعصب لهم فوق المعتاد.

-          كلنا نمر بهذه الحالات.

-         طموحي ان تكون قصة حبي لشخص هي افضل قصة حب في العالم.

-         في الحب لا يهم ان تكون قصتك افضل قصة، المهم ان تكون اسعد شخص في العالم بهذا الحب.


اعتراف: الكلام المكتوب في كل قصصي ليس من الضرورة ان يكون مبادئي او وجهة نظري، هو مجرد كلام اعجبني و حبيت ان اشاركه معكم، كلام تعلمته من تجارب واشخاص و كتب وامور كثير غيرها، بعضه نسخته او اخذت نفس فكرته لكني غيرت محتواه. 

حصار من نوع آخر.

- حاسس اني محاصر.

- محاصر كيف وانت في بيتك؟

- محاصر من افكاري ودنيتي وكل شي حولي، محاصر في علاقاتي بالناس، محاصر بتفكيري المعفن، محاصر من امي وابوي مع اني احبهم، محاصر من انتظاري اشياء عارف انها ماراح تصير من ناس احبهم، محاصر من انتظاري ل اللحظة المناسبة عشان اقدر اقول اني مبسوط في ذيك اللحظة بالذات، محاااااصر.

- واضح انك مااستفدت من اي شي قلته لك في السنين او بالاصح العقود الماضية.

- يخي والله بحاول بس مني قاااادر، الحصار صار مرررره قوي و السحابة السودا اللي دايم تحاصرني صارت سودة اكثر.

- طيب انا راح اشغلك من الحصار دا واحاول اعطيك مفاتيح عشان تفكه.

- ياريت والله.

- تذكر ايام كنت صغير وكيوت ؟

- يب ليه؟

- ماكنت محاصر صح؟

- ممممم نوعا ما، حصاري كان على اشياء بسيطة وتافهة.

- ياسلام علييييك، انت بنفسك قلتها اشيا بسيطة وتافهة. وحتى كنت مبسوط اكثر وكنت تعرف هدفك اكثر صح؟

- يب تقريبا. 

- طيب انا اقولك، ترا همومك اللي دحين انت عايش فيها وحصارك دا بعد فتره حتشوفه شي تافه وبسيط. و هدفك دحين مو باين ودا شي طبيعي جدا لشخص في عمرك، انت مو حمار و لا غبي و لا شي، انت بس منتا متعود على اسلوب الحياة دا، عقلك و نظرتك محصورين على الاشياء اللي ماتملكها و بتحاصر نفسك بيها. اذا بديت تطالع في الاشياء اللي تملكها و تتمعن فيها، حتى الاشياء البسيطة جدا، راح تعرف النعمة الي انت فيها وراح تتوسع افاق عقلك وتفكيرك بشكل كبييير.

- يخي اوكي الحمدلله عارف اني في نعمة، بس ابا اكون زي غيري يخي، ابا اخرج ابا افل ابا اسافر ابا يكون عندي زوجة احبها او على الاقل "خوية".

- طيب انت قاعد تخلط اشياء كثير مع بعض، اولا لازم ما تقارن نفسك باحد، انت لك رونقك الخاص، انت لك عقلك الخاص فيك لا تعطيه لاحد عشان يتحكم فيه بدالك. الزوجة او الخوية والسفر و الخرجات كلها اشياء ماتقدر تتحكم فيها دحين، تبا تسافر سافر، بس خطط من بدري وحاول تجمع فلوس للسفرة، لاتقول مشوار و متى حسافر، خطط وحدد البلد و جمع الفلوس وسافر، اذا تقولي اهلي مايوافقوا يصير مالك الا تنتظر و تشغل نفسك بفكرة ثانية تقدر تطبقها. و بالنسبة للخوية انا بقولك شي. ترا ربنا مامنعنا من تكوين العلاقات المحرمة الا لمصلحتنا، صدقني ماراح تنبسط وانت على علاقة و راح تكون مؤقته، ممكن تنبسط يوم او شهر بس حتتعب سنة بعد انبساطك المؤقت، ف ليه ماتصبر سنة او سنتين بقناعتك و برضاك و تنبسط بالموجود في السنتين و بعدين تتزوج بالحلال وبدل ماتنبسط يوم او يومين في العلاقة تنبسط العمر كله ان شاء الله ؟ عارف ان صعب شوي و الشي في النهاية راجع لك وانت حر وممكن تكون علاقة من الان وتنتهي بزواج لكن اذا بتريح دماغك نصيحتي انك تصبر وبس.

- طيب امي و ابوي احيانا يمنعوني من اشياء ماهي حرام بس عشانهم خايفين عليا او زعلانين مني فيمنعوني، كيف انبسط بالله؟

- الاعمار بيد الله والله يحفظلك اهلك وأهلي وأهل الجميع، مهما منعوك من اشياء و حرموك من "سعادتك" في النهاية السعادة الابدية عندهم، وهم مهما سووا معاك اشياء سيئة ماراح يغير الحقيقة انهم يحبوك اكثر من نفسهم. حاول ترضيهم وتتناقش معاهم و حاول تتوقع ردهم و ماتتفاجئ لو رفضوا، عادي انهم يرفضوا وحط في بالك انها كلها كم سنة ويموتوا لاسمح الله وتصير حر نفسك لكن في ذيك اللحظة راح تكون فقدت اغلى كنزين في الدنيا، اللي هم امك وابوك و ربي يطولنا في اعمارهم يارب.

- امين الله يحفظهم. تعرف اش اكره؟ لما احس ان محد طاق لي خبر في الدنيا، عارف ان مو لازم احد يطق لي خبر و ان ربي معايا في كل وقت، بس نفسيا كدة اجلس اطالع في الناقص وهو ان شخص يطق لي خبر.

- عادي حس كدة بس لا تعطي الشعور دا اكبر من حجمه، اقولك شي.... تعرف انه كل واحد فينا عنده عقل صح؟ تعرف ان عقل الانسان بحد ذاته معجزة اذا وظفه الانسان صح؟

- كيف اوظفه يخي؟ حاولت اوظفه بس مالقيت الشي اللي يبسطني و يشغل مخي صح، حاولت اسوي كم شغلة جديدة وتضيع وقت و تحتاج تفكير بس كلها ما جذبت مخي.

- عادي مو مشكلة جرب غيرها، بس اهم شي انك لاتوقف تفكيرك بسبب انك تبا احد يطق لك خبر او ان في احد مزعلك، حط في بالك انك مو مخلوق عشان احد، انت ربنا خالقك لنفسك، اتحكم في نفسك و استغل وقتك بالتفكير في اشياء جديدة، العقل بيقدر يصنع معجزات زي ماقتلتك بس يحتاج فكرة، كل يوم حاول تخترع افكار حاول تشوف اشياء جديدة وتطبقها على قد امكانياتك.

- زي ايش طيب؟

- زي انك تسوي مقطع بسيط وتنشره ويكون المقطع عن اي شي سواء كورة او توعية او دين او العاب او اي شي. ممكن تجرب تكتب قصص و تطلق خيالك فيها او تكتب عن الرياضة او الافلام او اي شي يعجبك، ممكن تجرب تلعب بلايستيشن او تصمم لعبة، ممكن تجرب تروح محل آمن  وتفحط بالسيارة، انت حدد الشي الي تباه و ابدأ فكر في اشياء تسويها و تكون جديدة، فكر فكر فكر اليييين حتطلع بشي مجنون. حتى لو كان مكرر عادي اهم شي انك تسويه باتقان.

- يخي بس احيان مررة اكتئب وعقلي يقفل، اش الحل؟

- طبيعي هذا الشي يصير لنا كلنا، بس حاول انك تفك الاكتئاب هذا بهذي الافكار، حاول انك تخرج كآبتك و زعلك عن طريق هذي الاشياء و تثبت لنفسك انك فنان و انك مميز و انك عايش!. حتى لو بعض الناس يكرهوك، حتى لو محد يحبك، حتى لو كلهم يحطموك، في النهاية هذا كله ماراح ينقصك او يغير فيك شي، انت راح تكون مثل ما انت و تقدر تحسن نفسك و تقدر تحقق كل شي الناس قالوا لك ماراح تحققه وبعد ماتحققه راح تحس بنشوة قوية جدا و سعادة لاتوصف لانك كسرت كلمت الناس و وريتهم معجزتك، حاول تجرب اشياء جديدة حتى لو مو تخصصك او ماتعرف لها.

- يخي طيب انت بتقول لي اختار لك مجال وفكر فيه ودحين تقولي جرب اي شي حتى لو ماكان تخصصك، تستهبل معايا؟

- لا مااستهبل، درسني دكتور اسمه محمد ريحان مقبول، قال للطلاب:  Learn everything from something and learn something from everything. يعني اتعلم كل شي عن شغلة معينة وفي نفس الوقت اتعلم شي بسيط من كل شي.  اتمنى تكون وصلت.

- وصلت وصلت. يخي نفسي اقدر اقتنع بالكلام ذا بس عارف أني محا اقدر.

- عادي مو لازم تقتنع دحين، اهم شي انك تفهم معنى الحياة وتفهم انها فتره وحتعدي، وتفهم ان اللي انت جربته في حياتك الى الان يعتبر قليل لو انك قارنته بعدد السنين القادمة لك في حياتك ان شاء الله، 

- يارب.

-تعرف ايش  مشكله ثانيه فينا احنا البشر؟

- ايش؟

-اننا مانصبر، وإذا صبرنا اتعنتنا وماعجبنا قضاء ربنا، تعرف ايش هو صبر أيوب؟

-اسمع به بس ما اعرف التفاصيل، ايش القصه؟

- أيوب نبي من أنبياء الله، كان عنده أهل و زوجه وابتلاه الله بمرض اتعبه و ابتلاه الله بانه توفى جميع أبناؤه وانقطع عنه ماله واستمر هذا البلاء لمدة 18 سنة ومحد كان بيساعده غير زوجته بس، أيوب كان يقول ربي اعلم بحالي وكان صابر على البلاء من دون مايدعي ان الله يرفع البلاء عنه، الى ان اشتد البلاء عليه وما قدر يقاوم قال: {أني مسني الضر وأنت أرحم الراحمين}، وفي الآية الأخرى، قال: {رب إني مسني الشيطان بنصب وعذاب}، فعند ذلك استجاب له أرحم الراحمين، وأمره أن يقوم من مقامه، وأن يضرب الأرض برجله، ففعل، فأنبع الله عيناً، وأمره أن يغتسل منها، فأذهب جميع ما كان في بدنه من الأذى، ثم أمره فضرب الأرض في مكان آخر، فأنبع له عيناً أخرى، وأمره أن يشرب منها، فأذهبت ما كان في باطنه من السوء، وتكاملت العافية ظاهراً وباطناً؛ ولهذا قال تعالى: {اركض برجلك هذا مغتسل بارد وشراب}.  فكشف الله عنه البلاء ورزقه نفس عدد أبناؤه مرتين، الزبدة من القصة ان ربنا مع عبده وان الصبر له اجر ومثوبه عاليه من الله، و ربنا خص الصبر بالإنسان دون الحيوانات والملائكة، تصبر يعني ترضى بعطاء الله وقضاؤه خيره وشره مو صبر يوم او اسبوع او سنة، صبر برضا مع قضاء الله من دون اي عجلة، صدقني اذا صبرت و أديت العمل الي يوصلك لمرادك مع الصبر و الايمان ربنا راح يكافئك بأفضل مما كنت متوقع. انت سوي اللي عليك وثق في ربنا انه راح يكافئك، حتى لو ماكافئك في الدنيا راح يكافئك بأحسن منه في الاخره ان شاء الله.

- يااااارب و شكرًا على المعلومات الجديدة.

-يارب تساعدك بس.

 - يارب. 

ياسر حاول يصبر ويصبر لكن الصبر ينفذ وهو مثل معظم الشباب عنده الطموح العالي و العجلة اللي تخلي الواحد يتمنى الحصول على المحصلة النهائية بأسرع وقت، عنده معنى الصبر يعني يصبر يومين او أسبوع بالكثير. احد مشاكل ياسر انه يجد سعادته بأشياء معينه وأحيانا أشخاص محددين، اذا غابو عنه او بعدوا لظروفهم الخاصة يزعل منهم ويكتئب من دون صبر، ياسر بدأ يفكر في هذه المشكلة، بدا يفكر في كلام صديقه عن معجزة العقل، بدأ يتوسع في نظرته للأمور و في نظرته لأسباب اكتئابه، بدأ يلاحظ ان عقله يقدر يستوعب حاجات اكبر بكثير مما كان يتخيل، قال في نفسه: "ليه احد نفسي بأشياء معينه في حياتي؟ ليه مااوسع آفاقي و أسوي اي شي بسيط واستمر واصبر عليه الى ان يصبح مشروع في المستقبل؟ او على الأقل حتى لو ماصار مشروع أكون استثمرت وقتي في شي مفيد." لكن من الناحية الثانية عقله السلبي بدا يكلمه ويقول:" طيب انت حتسوي شي ومحد طق لك خبر و مع نفسك، ليه تضيع وقتك فيه و أصلا الناس اللي تحبهم ماحمسوك عليه؟" لكن ياسر أتذكر على طول انه راح يحد عقله اذا فكر كذا، و استوعب ان كل شي يبدأ صغير جداً ثم يبدأ يتشكل مع الوقت الى ان يصل ذروته، مشروعه راح يصير له كذا لو استمر عليه، وحتى حياته بعد مااتفكر اكتشف انها ماشيه بنفس المبدا وبعد فتره بإذن الله راح تصل للذروه ويصل مستوى السعادة فيها لمستوى عالي مثل ماكان نطفة في بطن امه واتشكلت الى ان اصبحت جسم كامل، استوعب ان اساس مشروعه وحياته هو الاشياء اللي حيسويها دحين، بدأ يشتغل على مشروعه الخاص و بدأ يحط معايير واضحة من البداية و كان واثق ان ربنا راح يوفقه في مشروعه لان ربنا دائما يربط الايمان بالعمل، اذا آمن بأن ربنا راح يوفقه و سوا العمل اللي يمشي مع معاييره راح ينجح المشروع باذن الله.   

اعتراف: الكلام المكتوب في كل قصصي مو شرط يكون هو مبادئي او وجهة نظري ، هو مجرد كلام عجبني و حبيت اشاركه معاكم، كلام اتعلمته من تجارب واشخاص و كتب و اشياء كثير ، بعضه نسخته او اخذت نفس فكرته بس غيرت المحتوى. 

خنقة

- اصحي.....

قوم هيا.......

هياااااااااااا........

قوم يخي مافي وقت...........

يكفي نوم.................

يالله قوم.............

قوووووووووووووووووووووووووم...............

- طيب صحيت خلاص، قلق انت. قلللللللق.

- احسن عشان ثاني مرة تصحى بسرعة.

- طيب دقيقة، انا صاحي اصلا انت بتصحيني من ايش بالضبط؟

- توك تلاحظ؟!

- ممممممممم لا تصرف جاوب.

- باصحيك من ايش تتوقع؟

- ممممممممم من غبائي؟

- يعني انت غبي؟

- لا انت الغبي.

- طيب جاوب باصحيك من ايش؟

- مممممممممم من الخنقة؟

- اي خنقة ؟! احد ماسكك يبوي؟

- لا يخي بس مخنوق في صدري، مخنوووووووووووووق.

- ياساتر!!، طيب حل ام الخنقة هذي.

- مني قااااااااادر والله.

- جرب يخي، جرب عيش حياتك بشكل مختلف.

- احس اني جربت كل شي.

- هذي اكبر كذبة ممكن الواحد يكذبها على نفسه.

- كيف يعني؟ خلاص احس سويت الاشياء اللي ابغاها واقدر عليها، في اشياء ابغاها بس مستحيل اسويها، مااقدر ابدا.

- مممممم، طيب اش خانقك دحين؟

- ممممممممم روتين ممل، امنيات عارف انها ماراح تصير، حياتي البائسة ومني قادر اغيرها او اغير نفسي، عالق في الحياة، عاااااالق.

- علقوا ابليسك يشيخ، ياابني الحياة كل ماتكبر التفاهات فيها تجيك الخنقة، وكل ما تشوفها من صورة اكبر راح تحس ان العالم مو واقف عليك و انك مجرد عامل بسيط جدا في استمرارية الحياة. و طبعا ترا العالم كله تجيه ايام يكون مخنوق زيك او اكثر!.

- مني فاهم اش التفاهات واش الصورة الكبيرة ؟؟ بطلك كلام الكتب وخليك مزبد وواضح.

- التفاهات قصدي فيها انك تحس ان مالك هدف، انك نكرة وان محد شال همك و تقعد تعقد كل شي يصير في حياتك وتربطه بانك انسان فاشل ومالك قيمة، اهم شي تقعد تعقد :)، الصورة الكبيرة اننا كلنا في هذه الارض و ورانا حساب و ربنا معانا و شايفنا في كل خطوة صغيرة او كبيرة نسويها. الله معاك طول الوقت و هذا السبب لحاله المفروض يحفزك تخرج من اي خنقة ، كابة، قلق، توتر، او اي حالة تخليك زعلان.

- يخي ونعم بالله، بس والله ذنوبي كثيره وايماني ضعيف، احس ربي بيعاقبني على حياتي، احس اني مقصر جدا في حقه.

- استر على نفسك ياابني، شوف مافي احد كامل وكلنا مقصرين و ربنا عارف بحالنا اكثر من نفسنا.

- طيب اش الحل؟

- الحل انك تسوي كل اللي تقدر عليه عشان ترضي ربنا، انت مقصر في حاجات حاول تقلل من التقصير فيها، وشوف الاشياء اللي انت بتسويها من زمان وبترضي ربنا فيها و حاول تطورها و تحسنها اكثر. يعني مثلا لو انك تبر والدينك، هذا الشي يرضي ربنا، حاول تبرهم وتسعدهم اكثر، اذا انت محافظ على صلاتك مع الجماعة، حاول تصلي السنة و تكسب الاجر كامل، و كدة يعني.

- ممممممم راح احاول بس يخي دايما ادعي وربي مايستجيب. ليه يخي لييييييييه؟

- حسب خبرتي من الائمة والشيوخ عن الدعاء، ان لما الواحد يدعي، دعائه ماراح يتغير عن نتيجتين، الاولى هي ان ربي يستجيب دعائك سواء اليوم او بكرة او السنة الجية او بعد 10 سنين، المهم حيستجيب لك، والنتيجة الثانية ان كل مرة تدعي ربي يعوضك عن طلبك بشي احسن منه في الجنة او يوم الحساب ان شاء الله، و هذا غير ان ممكن اللي تبغاه مايكون في مصلحتك وربي مانعه منك لانه راح يضرك.

- ممممممم طيب يخي كل مرة احاول اتوب وابطل ذنوبي ارجع لها اش اعمل؟؟

- شوف ربنا قال ان لو البشر بطلوا يسووا ذنوب راح يستبدلهم بناس يذنبوا ويستغفروا، طبيعة البشر اننا نذنب، مو يعني انك تروح تخرب امها، بس اهم شي تعرف انك غلط و تندم لما تسوي الغلط، وخليك عارف ان ربنا غفور، وقال في القران: ( قل ياعبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم)، تعرف اش يعني اسرفوا؟ اذا ماتعرف ادخل عمك قوقل وشوف اش يعني.

- عمك انت.

- المهم الزبدة ياعزيزي، لما تنخنق اسمع او اقرأ قران بصوت الشيخ اللي يعجبك، وحاول انك اي شي تسويه و تحب تسويه تخلي نيتك و جزء منه لله، مو شرط انك تفيد احد بس الاخلاص مع النية راح يعطوك الاجر ان شاء الله، حاول دائما تكون متفائل بان الافضل مكتوب لك.

- يخي طيب كلامك دا زي كل محادثاتي معاك، في البداية اخذ دفعة رهيبة منه، وبعدها انساه وارجع مخنوق من هبل الحياة. 

- عشانك غبي.

- الغبي مايكلم الا غبي.

- اهاااااا، خليني ساكت بس. 

- طيب نرجع، دحين منجد انسى كلامك هذا بعد اسبوعين و ارجع انخنق، ابغاك تساعدني كيف ماانساه.

- روح اقرب مكتبة، واشتري هارديسك مساحته اكبر عشان ماتنسى.

- ههه هه ه ه ه يخي كيف فلة انت ؟

- كدة.

- طيب جاوب !

- شوف اعتقد السبب انك تخلي حياتك روتينية و تاخذها زي ماهيا، ماتحاول تسوي شي جديد او انك تجرب تعتبر ان هذا اليوم هو اخر و اهم يوم في حياتك.

- برضك كلام الكتب ذا، عربي لو سمحت.

- يخي اسمع دحين الناس يقولوا لك عيش واستغل كل لحظة في حياتك صح.؟

- صح

- طيب هذا الشي احيانا يسبب لك احباط لانك تشوف العالم حولك عايشة ومبسوطة وانت منتا عارف كيف تعيش صح ؟

- ممممممم تقريبا.

- طيب انا بقول شي، اتخيل و منجد صدق الفكرة دي، انك راح تموت خلال اسبوع او اقل، لسبب مجهول المهم انك راح تموت. اش راح يكون اكبر همومك؟

- مممممم اول شي اني ارضي ربي واحافظ على كل صلواتي و اكون عابد له كل الاوقات.

- اوكي هذا بالنسبة لدينك، حياتك اش حتسوي؟

- اوكي راح العب كورة كل يوم مع كل الشباب، راح اقابل كل اصحابي، اقول للناس اللي احبهم اني احبهم، عارف انه صعبة اقولهم كدة بس اذا منجد حموت راح اقولهم كدة لانه مافرق معايا كدة كدة حموت واحسن اموت وضميري مرتاح. راح اجرب اي شي ماقد جربته، ممكن اصيد او اغوص في مكان عميق او اني انام لاقصى ساعات ممكنة او اني اسوق بسرعة مجنونة جدا، راح اجرب حاجات كثييييير قبل الاسبوع ذا ! 

- طيب وحتتمنى ان في وقت اكبر عشان تسوي الاشياء اللي كنت دائما تاجلها وعشان تجرب حاجات ماقد جربتها اكثر صح؟

- ممممممم صح تقريبا، دائما نفسي اجرب اسوي عمل تطوعي مستمر في حياتي بس مافيا، اقول لما افضى له، اذا فعلا  حموت راح احاول اسويه بكل طاقتي وانشر فكرتي.

- حلو الكلام.

- طيب اش المغزى من الكلام دا؟

- حاول تفكر وتشوف اش قصدي منه، وماراح اقولك المغزى الا بعد فترة بعيدة.

- مشواااااااار. 

- هذي ضريبة الكلام المفيد يحبيبي. عشان يرسى الكلام اكثر و ماتجيني مخنوق بعد اسبوعين.

- اوكي

- يالله سلام

- سلام

"ممممممم يخي اش قصده بكلامه؟؟ مافيا افكر والله، بس منجد يخي لو اني حموت بعد اسبوع اش راح اسوي؟ اول شي محا انام دحين و راح استغل وقتي ذا، طيب اش غيره؟ راح اكون طيب مع كل الناس اللي حولي و اعطي انطباع اني شخص رهيب واخليهم يفتكروني بكل خير. راح اروح مطعم فخم واجرب اطعم شي عندهم وبعدها اشتري اطعم حلى في البلد. 

طيب بس برضو ما عرفت هدفه، يكون عارف اني حموت بعد اسبوع؟؟ لا لا  استغفر الله اش الكلام دا، طيب اش قصددده؟

 مممممم ممكن قصده اني لازم  ماافكر في المستقبل كثير، وابطل اقارن نفسي مع العالم لاني اذا راح اموت راح اسوي الاشياء اللي تعجبني حتى لو العالم يشوفوا الشي اللي يعجبني خايس. حلو هذي نقطة مهمة والله. اش كمان؟؟

 مممممم العالم منجد يقولوا لك عيش، بس ماقد قالوا انك حتموت، تصدق لما يقولوا حتموت الواحد ينتبه لحياته اكثر من لما يقولوا له عيش واستغل حياتك! راح تحاول انك تعيش اكثر و تتنفس اكثر وتنبسط اكثر، راح تنسي الماضي والمستقبل وتركز على اللي بتسويه حاليا وتستغل وقتك بكل طاقتك، هذا الهدف!،

 اني استغل كل يوم وكل لحظة و كل ثانية، مافي قانون يمشي عليه العالم في اسلوب حياتهم، انا اذاكر بطريقتي و اكل بطريقتي وانام بطريقتي و افكر باسلوبي، وأربي اولادي بطريقتي الخاصة وأعامل زوجتي بالطريقة اللي تعجبني اذا اتزوجت ان شاء الله، حياتي وانا اتحكم فيها مثل ماابغا، اذا العالم يذاكر من بدري و ينام قبل 12 و يصحوا كل يوم الساعة 8 و اذا ماصحيو تعبتر مصيبة، كل هذا اذا صار ماراح يجبرني اني اصير زيهم ولا راح يقلل مني ابدا،

 هي حياتي واذا راح اموت، راح انام الساعة 12 الظهر و اصحى 12 الليل ، واحاول بكل قوتي اصلي كل صلواتي في المسجد حتى لو اني اصحى اصلي وارجع انام، راح يقولوا اني مجنون؟ بكيفهم بس راح اكون مبسوط جداااااا وفئة قليلة من العالم راح تجرب السعادة اللي راح اكون فيها. اااااااخ والله لازم استغل حياتي، لااااااازم، لازم ارضي ربي وفي نفس الوقت اشوف شي يسعدني و احاول بأي طريقة اني اكسب الاجر منه. لاااازم."

بعد كل الكلام هذا نسى اخونا ان يتاكد من الهدف من صاحبه، وعاش حياته كأن كل يوم هو اهم يوم في حياته، في ايام انخنق فيها لكنه دائما يتذكر ان الله بيساعده وعالم بحاله في كل الاوقات، ويكفي ان هو سليم ومعافى ومافيه اعاقات و اشياء خلقية شاذة عن الباقين. هذا اهم شي يتذكره و يخلي مبسوط.

اعتراف: الكلام المكتوب في كل قصصي مو شرط يكون هو مبادئي او وجهة نظري ، هو مجرد كلام عجبني و حبيت اشاركه معاكم، كلام اتعلمته من تجارب واشخاص و كتب و اشياء كثير ، بعضه نسخته او اخذت نفس فكرته بس غيرت المحتوى. 

الاكتئاب

الاكتئاب...... اذا سألتني من اعز اصدقائي..... راح اعطيك اسماء اصدقائي واخر شي راح اذكر واحد اسمه اكتئاب. وهو عشان اكون صريح وحقاني اكثر واحد وقف بجانبي في معظم اوقات حياتي. اي شي اسويه صغير او كبير ايجابي او سلبي حلال او حرام الاقي الاكتئاب واقف جنبي. كل مرة يقولي كلام جديد، مرة يقولي الناس سبقوك في شغلتك، مرة يقولي اللي بتسويه ماله داعي، مرة يقولي اصلا انت مجنون، مرة يقولي اصلا انت محد يحبك في العالم، مرة يقولي روح انتحر. ولو تبغوا الصراحة هو صادق ودائما معاه ادلة لما يجيني، ادلة اشوفها حقيقية وقوية جدا. يجيك في احلامك، في دراستك، في حياتك، في كل مكان. طول الوقت وهو واقف بقربك. لدرجة انه صار يقولي اسمه بالانجليزي وهو depression. من كثر قربه لي صرت ابحث عنه في النت. لما أفتقده اسأل الناس عنه، وهو جدا اناني، مايبغاني اخرج مع احد او اتكلم مع احد....يبغاني له فقط.
حاولت اتخلص منه، بحثت في النت عن الابتعاد عنه ولقيت مواضيع كثيرة لكن للاسف مافي موضوع قدر يقطع علاقتي القوية به. في البداية عرفت انه لازم ماافكر فيه كثير وانه اول مايجيني اشوف لي شغلة او على الاقل فكرة او موضوع مختلف عن المواضيع اللي يقولي هي. حاولت اطبق الكلام لكني ماقدرت. 


-يخي اكتئاب

-احسن

-مامنك فايدة

-احسن.... ليه مكتئب؟

-مدري كدة مكتئب وخلاص.

- ترا مافي اكتئاب يجي من دون سبب، في اسباب كثييييرة له، حاول تفكر في اهم الاسباب اللي تخليك متكئب.

اول درس اتعلمته هو احاول ابحث عن الاسباب و اعترف بوجود الاكتئاب في حياتي. احاول اعرف متى الاكتئاب يتقرب مني و اعرف اساليبه اللي يسويها عشان يكلمني. 

-ممممممممممممم، سبب الاكتئاب الاول هو الطفش والوقت اللي بيضيع هدر والتفكير في اشياء انا مااقدر اتحكم فيها، احس اني مهمش واني ما قدرت اقدم شي للحياة.


-برب


-تيت 
جلست انتظر عودة صديقي لفترة من الوقت، في خلال هذه الفترة جاني اعز اصحابي (الاكتئاب) وبدأ يناقشني ويقنعني انه صديقي مايطيقني ولا يحب يتكلم معي. "لو يحبك كان كلمك" "شوفه صفك" "شوفه دخل واتس ومارد عليك" "ترا محد يحبك" "لازم ماتحب احد في العالم" "كلهم يبغو مصلحة منك".....يعطيك افكار و مواضيع تخليك ودك تستفرغ....تستفرغ مو عشانك مريض او الاكل ماناسبك لكن تستفرغ هذي الافكار. ودك تنساها وتبدأ من جديد من غير اي معلومة عن هذي الافكار. الاكتئاب يجيك وقت ضعفك ويعطيك ادلة وبراهين ويخليك تتخيك انها حقيقية و يخليك تؤمن و تقتنع انه هذي الادلة منجد حقيقية. 

نمت.  صحيت اليوم الثاني واتذكرت انه في محادثة ما كملتها مع صديقي و اتذكرت انه سحب علي او ممكن انا اقتنعت انه سحب علي.

-وينك امس؟؟

-مالك صلاح.

- يخي ماتبغا تكلمني قولي في وجهي مو لازم تجلس تسلك لي وتتعبني عالفاضي.

-انتبه على كلامك. 

-يخي طيب ليه تصفني؟؟

- يخي ماصفيتك، انشغلت، ابوي كان يبغاني في شغلة، رحت رجعت كان عندي واجب حليته. اتعشيت نمت. يخي ترا لاتحسب انه العالم فاضي زيك، اذا انت فاضي مو شرط الباقين يكونو زيك.

-طيب كيف افتك من هذه الافكار؟

- لاتعطيها وجه. لاتهتم وتفكر في شي انت مالك علاقة بيه. سيب الموضوع على ربك. عيش حياتك وانبسط.

- يخي عارف هذا الاكتئاب زي السحابة.....تجي تغطي عليا وتخليني مااشوف شي. احيانا خلاص مااشوف اي شي ابيض في الدنيا. احس نفسي منعزل من العالم. افكار تجيني من الاكتئاب واقتنع بيها. زي انك ماتطيقني او انه مالي داعي او اي فكرة هبلة. 

- سؤال بسيط...قيد اكتشفت انه هذي الافكار اللي اقنعك بيها الاكتئاب صحيحة؟؟ 

- خليني افكر.......لا.

-طيب خلاص اعرف انه واحد خراش يجي يالف على راسك ويلعب عليك وينكد عليك عالفاضي. مو الناس يبغو مصلحة منك هو اللي يبغا مصلحة. يبغا يطفشك وياخد وقتك وتفكيرك على ولا شي. انساه. جرب شي جديد. سوي اي شي يبسطك حتى لو مافي احد في العالم يحب الشي اللي انت تسويه. اهم شي انه انت تنبسط بيه.  لاتشيل هم الناس ولا تجلس تفسر تصرفاتهم او حركاتهم وتسوي شيرلوك هولمز على غفلة. الدنيا اسهل وابسط من الكآبة. ودائما اتذكر انه كل الافكار اللي تجيك منه غلط هو بس يحاول يقنعك باسلوب تفكيرك و اسلوب تفكيرك مختف عن الناس من حولك. اذا انت ماترد على واحد عشان انت ماتطيقه هذا مايعني انه اذا واحد مارد عليك يعني مايطيقك، ممكن هو كان مشغول او كان مزاج سيئ او او او. لاتاخذ الموضوع من ناحيتك فقط. خذ الموضوع من ناحيتك ومن ناحية الشخص الاخر وحاول تلتمس له عذر. 

- جزاك الله خير. 

- امين وياك. 

استنتجت بعد فترة، انه لازم مااستعجل في حياتي، سبب الاكتئاب هو اني اكون مستعجل واقول ليه الشي اللي ابغاه مايصير. او ليه درجتي سيئة او ليه حياتي مافيها شي مثير. الجواب لكل الاسئلة هذي هو عند ربنا. لازم اؤمن بانه ربي كاتب الافضل. مو شرط اليوم مو شرط بكرة او شهر او سنة او مدة زمنية معينة. المهم انه في الوقت المناسب راح اعرف سبب كل شي صار لي وحاكون سعيد اني اتجاوزت كل العقبات ووصلت للي ابغاه. 

ايام الاكتئاب هي مجرد ايام سودة احتاج اني اعديها في حياتي و احتاج اني اعرف انه كل البشر عندهم نفس هذي الايام السودة. كل واحد يتعامل معاها بطريقته الخاصة وكل واحد يتعامل مع صديقه المفضل ( الاكتئاب ) بالاسلوب اللي يناسبه. صديقي له اساليب مختلفة عن صديقك. حاول تتفائل دائما، وتذكر انه الرسول صلى الله عليه وسلم مر بظروف وبايام سوداء جدا و قدر يتعادها وينشر رسالته بافضل صورة ممكنة. نقول الحمدلله و نعيش حياتنا و نحاول ان نقدم افضل مايمكن في حياتنا. احاول مااعرف اجوبة الاسئلة الصعبة في حياتي. واحاول استمتع باني اعيش تجربة السؤال واجرب كيف اتعامل مع الصعوبات بافضل طريقة.  


اعتراف: الكلام المكتوب في كل قصصي مو شرط يكون هو مبادئي او وجهة نظري ، هو مجرد كلام عجبني و حبيت اشاركه معاكم ، كلام اتعلمته من تجارب واشخاص و كتب و اشياء كثير ، بعضه نسخته او اخذت نفس فكرته بس غيرت المحتوى. 

شوية جنون

الضحك...... الضحك من الاشياء القليلة في العالم اللي تخليك تحس انك عايش، تخليك مبسوط، تخليك تحب الحياة. مشاهدة ستاند اب كوميدي، افلام، مسلسلات، يوتيوب واشياء اخرى تساعدك على الضحك. الضحك احيانا يكون على هيئة مشهد تشاهد امامك على الطبيعة وتضحك، مثل لو صاحبك كان جالس على كرسي وانكسر ظهر الكرسي وطاح صاحبك على ظهره. وبعض الاحيان يكون على صورة نكتة يلقيها احد الاشخاص وبعض الاحيان النكتة تحتاج الى عمق و تحتاج الى اسلوب القاء لجعل المستمع او المشاهد يضحك. طرق كثيرة ومتنوعة والهدف واحد. لكن مهما كانت هناك من طرق مافي احلى من ضحكة يسببها شخص مقرب لك. وتكون خالدة في ذاكرتك اكثر من المواقف والطرق الاخرى. احيانا نكون في حالات صعبة جدا و بكلمة واحدة من شخص مقرب ننسى كل المشاكل. الضحك ميزته البساطة، و الخروج عن المالوف، كل مرة نضحك نسمع او نرى شيئ جديد مامر علينا في حياتنا. 

-انا نفسي افهم ليه الواحد يتهيأ ويكتب مدونة؟ اش ام الطفش الي وصل له وخلاه يكتب مدونة؟ لا ويكتب شوي فصحى شوي كلام شوارع، مدري مين قله اكتب. عار عالقصص يارجل! 

-يخي انا حررررر اكتب وأالف زي ماابغا مالك صلاح مو عاجبك لاتقرا ولاتتابعني ولاتصاحبني، فكني. اكتب عربي انقليزي افغاني انا حر. يخي الواحد لما يكتب يرتاح والله، جرب منجد امسك ورقة وقلم افتح مذكرات الجوال افتح مايكروسوفت وورد و اكتب اي شي في بالك، حتنبسط. انا مرة كتبت نفسي في مليون ريال ونمت، صحيت لقيت مليون ريال تحت السرير! منتا مصدق صح؟ خليك، انت ماتعرف العالم لسه. بسيط جدا حط في بالك اللي تبغاه وتصحا الصبح تلقاه.... اي شي.... اي شي.

مرة جيت وحاولت اكلم واحد قام صرفني، كتبت في ورقة انه يكلمني لقيته جاي على طول! تخيل! مرة كنت ابغا انام مو قادر، تخيل بس كتبت ابغا...نمت!

مدونة و توتير و فيس و انستقرام وبي بي و واتس و و و، كل دا عشان نحس اننا موجودين! والمشكلة ماحسينا لسه وماراح نحس. ليه؟ نفسك تعرف ليه صح؟ انا دحين حاحاول اشوقك و اسوي اني رهيب و خطير. والحقيقة انه كلنا عارفين السبب. السبب اننا اغبياء. ايوا اغبياء مانرضى الا بالتراب، في البداية تبغا 10 يتابعوك بعدها 100 بعدها 1000 الين مليون وبعد المليون تبغا تكون اكثر واحد عربي عنده متابعين الين تبغا اكثر واحد في العالم عنده متابعين. حتى بعدها حتحس بالنقص لانهم مابيشاركو معاك كفاية. نحاول نرضى باللي عندنا بس مانقدر. لازم نعرف انه ربنا خلقنا كدة. ربنا حيتولى بينا، ربنا عارف مصلحتنا. 

الدكتور يفتي و المدرس يفتي و كل واحد يفتي، الدكتور يقولك حيرسبك وهو خراط زيه زي اي دكتور يحاول يحسسك انه فتك وقوي واخر الترم تلقى نفسك اي بلس غصبا عنه. يقولك احطك في راسي ومدري ايه وهو مع نفسه مايقدر يحط شعره في راسه قال احطك في راسي.


اضحك ايوا اضحك اش حتخسر؟! تقول اني سامج؟؟ ماسامج غير وجهك، يخي اضحك وبس، اضحك على الافلام والاشياء الهبلة اللي نفكر فيها اللي نسويها، اضحك على همومنا البسيطة جدا مقارنة بهموم الرسول صلى الله عليه وسلم، اضحك لانه الدنيا ماتسوى.  اذا بتمشي في الدنيا سوي مجنون لانه في الحقيقة كلنا مجانين. نحسب انه بس احنا العايشين والناس الباقين مع نفسهم، كل يوم في الشارع نشوف الاف الناس و مانفكر انهم زينا او عندهم مشاكل او هموم، نسوق ونقعد نسبسب ونشتم خلق الله كانهم حيوانات واحنا بشر. 

مررة جيت اكلم واحد قريب مني لكنه كان مكبر المخدة او مخمج او نائم حسب منطقتك وفهمك، المهم قلت احسن حال اني اتخيل المحادثة. فتحت المذكرات وبدات اكتب واتخيل ردوده واتوقعها.....

-انا موسوس....
-احسن.
-انت رمة مامنك فايدة.
-طيب لاتكلمني
-انت اللي كلمتني
-لا انت 
-اسري لا افقع وجهك
-وجهك ولا خشمك؟
-ممممم اصلا الوجه من الخشم يااحول. 
-لالا الوجه هذي محافظة صغيرة.
- يعني مو جزء من الوجه؟
-لالا جزء من الفلة.
-اهااااا.
-ليه موسوس؟؟؟
-ممممممم افكر في امور هبلة واحس اني مالي لزمة في الحياة، مامني فايدة، مالي هدف، مافي احد يحبني.
-طيب حبة حبة.... مالك لزمة: لو سالت النهر انت اش فايدتك في الحياة وانت كل يوم تسوي نفس الشغلة؟ حيقولك اهم شي اني اتحرك ومااطالع ورايا، لو سالت الزهرة اش فايدتك وانت مصيرك تتقطعي وكل مرة تعيدي نفس دورة حياتك؟ حتقولك انه اهم شي اني ادخل البهجة على الناظرين. مافي احد ماله لزمة في الحياة، طالما انه ربي خلقك وانت موجود وحي ترزق في هذا الكون راح يكون منك فايدة، واحيانا تكون منتا عارف اش فايدتك اصلا لكن منك فايدة. ممكن واحد كان معصب جدا ورايح يتضارب مع اهله قابلك وابتسمت له يقوم ينسى الهموم ويقول انا موجود وفي واحد ابتسم لي.

 تحس بالوحدة؟ لازم تعرف انه الوحدة هي نعمة من ربنا. نعمة تعرفك من اصحابك الحقيقين و تراجع نفسك معاهم، تعرف اش لك وايش عليك، تعرف من يستاهل حبك ومن لا، تعرف نفسك اكثر فيها، وتقدر تستغلها باي شي يخليك مبسوط، شي لنفسك انت يسعدك انت.
 مالك هدف هي نفسها مالك فايدة، هدفك الاستمرار في الحياة والاستمرار في التوكل على الله، لاتوقف ابدا ولاتقول خلاص استسلم، استمر و ابحث عن هدفك و ابحث عن مايسعدك وابحث عن نصفك الثاني. ابحث عن كل ماتريد وابدا لاتوقف، حاول تتذكر انه ماضاقت الا فرجت وانه بعد العسر يسر، هذا قانون ثابت في الحياة.  

 مافي احد يحبك او يهتم فيك:               

كل الناس عندهم نفس الشعور وكل نفس يحسو باحساسك، لاتفكر بذي الطريقة فكر انك موجود وانه الحب اذا مانجح من اول مرة "وهذا الغالب" مايعني انه مافي حب، واذا مالقيت الشخص المناسب لك مايعني انك سيئ او انك مكروه، يعني انه الشخص اللي يفهمك ماعرفك لسه وراح يعرفك. حاول تهتم بمن تحب و لاتنتظر حبهم لك. الوحدة هي جزء من طريقك لاكتشاف من يحبك تساعدك في ايجاد من يفهمك مع الوقت.
-دائما الكلام اسهل من التطبيق.
-طبعا لكن اذا حطيت هدفك الرئيسي هو تغيير طريقة التفكير والنظر للامور بشكل ايجابي، راح تصير مع الزمن انسان ايجابي و متفائل وسعيد تلقائيا.
-سعيد ولا حزين واالللا قريب ولا بعيد والللا.
واضح انك استفدت من كلامي.
-هههههههههه يب يب مرة. 
- الزبدة لاتفكر ابدا ولايخطر في بالك انك عديم فائدة.  do what yourself want.. ماراح اترجمها لك مو شغلي.
-ربي يسعدك.
- وياك يا موسوس.
-انا احمد مو موسوس. 
-تشرفنا.

بعد ماخلصت اقتنعت بالكلام. وحسيت اني انجزت واستفدت وارتحت واهم شي طلعت اللي في خاطري. ورحت للشخص النائم وقلتله: انت الخسراان انك ضيعت على نفسك المحادثة. بعدها بكا وقال: "قهررررر يخي". 

اعتراف: الكلام المكتوب في كل قصصي مو شرط يكون هو مبادئي او وجهة نظري ، هو مجرد كلام عجبني و حبيت اشاركه معاكم ، كلام اتعلمته من تجارب واشخاص و كتب و اشياء كثير ، بعضه نسخته او اخذت نفس فكرته بس غيرت المحتوى. 

اتمنى منكم الدعاء لوالدي الله يرحمه .... بدأت كتابة القصة قبل وفاته رحمة الله عليه

شكرا :)